Evo me opet.

Sad ništo če se danas teško kuho, ne zato če se ne bi kuholo nego za to če več nimo dobrih kominih. Ovu spizu če mi je pokojno mama kuhola, nojvečje je voli barba Vinko Bumba, a rodi se o provoj “Broškoj šporkoj jusi“.

Za vu juhu parvo bi vajalo imat komin, trinoge i jedon veli bronzin, pinku tanjih darvih, a nojboja je broško česmina i to suha. Sad kad smo paričali kužinu vajalo bi paričat i ono ča čemo stavit u bronzin, a to bi bilo isto dobro dobavit domoče!

U bronzin stavimo parvo mieso, mišono provie govedine, janjetine i malo bravetine, po butomo kompiri, kapule, karotie,nikoliko špigulih luka, pomidor, papriku, list selena, list bilega kupusa, malo konšervie i koricu od broškega sira, ulijemo vodie koliko hočemo da budue juhie jer se voda posli več ne dodoje i ne tribo pazit, posolimo i butomo malo papra.

Kad smo sve paričali, bronzin stavimo na trinoge ili ako ko imo provi komin onda na komoštre i ispod užgemo ogonj, i to joki dok juha ne prokuho i onda ga malo kalomo i gledomo da juha uvik lipo istiha kuho bit če gotova za dvi urie.

U vu juhu ne grie manistra, nego se juha ji skupa sa zelenjen jer se večina zeljenja raspode pa juha bude gusta i posli mieso sa dvo zarna soli i kompiron, sa ovin mieson lipo grie i provo kiselo jutika.

Ovu juhu se može skuhot i na obični ili ti modierni špaher i kolko god da san provovo nikad ni bila ka ona sa komina jednostavno nimo nega gušta, nimo smuoka od darvih!!!

U slost von bilo!