Evo me opet, vidi son da von se ovo moje kuhonje sviđo i da ste puno kuntientni sa ricetima pa evo još jelne kompliciruone ricete, a baž ste i pogodili jerbo je vrimie karnavola pa bi tukalo i našu pašticodu napravit!

I ovuol imo puno ricetih i nisu sve iste, ma mi griemo napravit onu storu izvornu:

Parva stvor je puoć u bikariju i vaziest miesa, a tribalo bi vaziest provu govedinu i to ne bilo koju,  čo stariju to boje i od te govedine vajo uziest ružu ili orih jer je to nojboji komad za pašticodu!

Svi već znomo da za paričat provu pašticodu vaja istratit i par don, e moj barba Mate – par don a troke četiri urie!

Parva stvor je oti naš komad miesa nabost sa špigulima luka, pancetie i karotie i onda u jedon večji sud stavit mieso u rosol, koji se čini vako:

Stavimo mieso, kapulu, luk, karotu, malo javora, kaduje i ružmarina i malo klinčičih, malo papra u zarnu i jedon muškatni orih, a onda u sve to ulijemo, po riedu žmul vina, žmul kvasine i žmul vodie dok mieso ne oplivo.

Takovi rasol se stavi digol u škutr i da ni puno teplo (danas bome u frižidier).

Vajo da stoji cili jedon don i vajalo bi ga koji put i obarnut.

Dobro je, evo mieso je odležalo, sal ga izvadimo iz rasola i nojdemo jelnu široku teču u koju ga možemo stavit peč i lipo okričot.

Pri nego počmemo vajo očistit kapulie, luka, karotie i petrusimula.

Stavimo u teču domoče mosti i kal se rasopi stavimo cili komad miesa peč, noglo ga pečemo sa svih stron dok se mieso dobro ne stisnie, izvadimo ga vonka i na tu most stavimo žutit kapulu i karotu i frišku i onu iz rasola i ne vajo žalit na tien, kapula i karota vajo da malo čapo za teču, e onda dodomo luk i petrusimul i dodomo mieso, pokrijemo teču i pomalo žutimo okričuč na sve strone, a svaku malo polijemo sa onin šugon iz rasola i če se dužie šufigoje, to je boje.

Kad ulijemo dosta rasola i vidimo da nan je to dosta šuga, pustimo je kuhot uru-dvi, e onda je začinimo, i evo ovol počinju problemi jer su dvi varste pašticode  – siromaška i bogatunska, a začinjomo je vako: u teču dodomo dvo -tri lista javora, malo suhih smokov, malo suhvic, soli i papra,naribonega muškatnega oriha i klinčičih (a u bogatunsku još griedu suhe slive i malo kanele, siromasi tega nisu imali), i obavezno domočie konšervie!

Pustimo je još istiha kuhot jednu uru, a kal mislimo da je gotova,  izvadimo mieso iz tečie i izrižemo ga na fete, šug procidimo kroz pašabruod ili štrukapatatu, mieso onda složimo u teču i polijemo sa štrukonin šugon, dodomo malo varinika, učinimo glogoj – dvo, pustimo pokriveno da odmoro.

Nojboje je jist sutradon, potepljenu sa njokiman ili domočin makarunima.

Ala evo da ne bi bilo napol, napisot ču kako se činidu i makaruni – oni su von siguri,  sa njokiman zno bit pi..arijih jer su ol kompirih. a več kompiri večie putih su vodenasti i onda njoke budu tvarde.

Znoči: uzmemo kilo brašna, prosijemo ga i usridu paričomo jomku, u nju stavimo pinku soli, maslinovega uja i malo mosti, stavimo i četiri cila domoča joja i šiest žumoncih, dobro to umisimo rukamim i pustimo malo da odmori.

Kad je odmorilo okinemo tisto na manje komade i po stolu pospemo malo brašna da se ne lipi pok lazanjuron razvojomo na tanko, nuožen rižemo kvadratiće i na ručicu ol darvene žlice omotomo makarun i pustimo hi pinku da se ošušidu, kuhomo hi u vručoj vodi ko i drugu manistru.

Posli vega vajalo bi popit i malo provega carniega vina i to oživje!

Evo, to je od mene, provojte ( ako imote voje voliko stot u kužini) i bilo von u slost!!

* Stavovi izneseni u kolumnama, vašim vijestima i komentarima osobni su stavovi autora i ne izražavaju nužno stav redakcije portala BOLinfo.hr