Tekst: Ivica Jakšić Čokrić Puko

OPROŠTAJ OD JIERKOTA MALVASIJE

(12. 8. 2018.)

 

Kal son nauči slova, i počie govorit, parvo mi je rič bila mama, drugo tata, a trećo Jierko Malvasija. Mama i tata bili su u kuću, a iza kućie Jierko Malvasija.

Nison jo ni zno ča to znači Malvasija, ma znon son ga reč i napisat. S Jierkotuon je bila drugo pisma. Tuol son olma vidi da s hrvatskin jazikuon ništo ni u riedu. Ime se lipo izgovoro, ma kako ga napisat? Jerko, Ijerko, Jierko? Odluči son se za Jierko, i tako je ostalo. S vrimenuon se izgubi Jierko, a osto Malvasija. Somo Malvasija. Uvik Malvasija.

“Puoj u Malvsije,” rekla bi mi mama, “da non duođe stisnut onu špinu ča cidi.”

“Puoj u Malvasije, pukla non je cijev ol vodie.”

“Puoj u Malvasijie, kjučanica non ne radi.”

Puoj u Malvasijie. Uvik u Malvasijie. I Malvasija bi uvik bi duošo.

Jedino ni mogo dohodit kal bi bi išo na ribe. Lovit lignje. Jedon put, kal mu se ćier rodila, ulovi je galjeba i na njega napiso Manuela. Tal se ni bacelalo o zaštiti životinja, a galjebih je bilo većie nego sada. A sigur son da vuon ni ni bi ulovi tega galjeba – som mu je duošo.

I jo son, učieć ol Malvasijie, hodi na ribe. S dvonaest godišć ulovi son lubina, priko dvo kila. Tata ga obisi na ganač u tezu. Jo vonka, i kal son se vroti: nimo lubina. Poludi jo, počie plakot: di je lubin?! “Puoj u Malvasije”, govori mi mama. Uto, Malvasija s lubinuon. Bi mi ga je sakri. Malvasija, vrag – iza kućie.

Onda smo se pripomistili, u drugu kuću. Malvasija isprid kućie.

“Puoj u Malvasijie,“ tal smo se već bili modernizirali, „boljer non cidi.”

“Puoj u Malvasije,“ nabavili smo i televiziju, „tuko montirat antenu.”

I vrota non je bi napravi Malvasija. I ogradu. I sudoper uriedi. Sve je čini Malvasija. Ne somo namin, nego cilemu Bolu. Ma namin nojvećie. I za vodu je kupi. I pi kafu u naš dvuor. I u svuoj dvuor iza, a namin isprid kućie.

A pivo je u svuoj dvuor, naš dvuor, u sve dvuore, po putima, po rivi. Pivo je ko slavuj. A nojlišie u crikvu. Blagoslovljen budi Bog, kuor bi se trieso. Smiluj mi se Bože, crikva bi se triesla. A kal bi bi potiego: Klanjamo se tebi Kriste – i komunisti bidu padoli na kolina.

A kako je pivo na prelstave Šušura?! Gujin rode, Svi smo mi judi, Apokalipsa, Cimer fraj… Bilo je tuot judih, žien, pivočih – i njegova je žena Rajka pivola – ali Malvasija. Kal bi Malvasija bi zapivo… ni se moglo bez Malvasijie.

A tuka´ će non bez Malvasije. Umar je Malvasija.

“Nieću već zvat Malvasiju priko dvuora”, rekla je mama.

“Nimo već našega Jierkota”, rekla je Rajka.

“Nimo već tatie”, rekla je Manuela i sin Pjer.

Nimo već Jierkota Malvasije. Mojega prijateja, susida isprid i iza kućie. Je da  niko vrime ni mogo. Ali kad je mogo, mogo je boje ol svih. Ol kal se bi razboli nijedna non špina ni molala. Nijedna cijev pukla. Kjučanica zatajila. Bojler procidi. Sve ko da se inkantalo. Ko da se još ni naučilo na druge meštre. A kal se i nauči na druge meštre, koji će to pivot ko ča je vuon pivo.

Nimo već Malvasijie. Umar je bolski Oliver. A ne tribo ni govorit Oliver, dosta je reč Malvasija, Jierko Malvasija: Blagoslovljen budi Bog, Smiluj mi se Bože, Klanjamo se tebi Kriste… nikuor će se gore morat poklonit Malvasiji.

Jerko Malvasija – Nesvakidasnji ulov gofa od 35 kg ispred bolskog porta 18.9.1967.

* Stavovi izneseni u kolumnama, vašim vijestima i komentarima osobni su stavovi autora i ne izražavaju nužno stav redakcije portala BOLinfo.hr